اونيلا غانم صليوا ، طالبة صف ثالث متوسطة، والمفروض أكون بصف السادس لكن بسبب الظروف اضطريت أن اكون بهذه المرحلة، عمري 17 سنة من قرية باطنايا، شاركت بالجلسة الي اقامتها جمعية التحرير للتنمية ضمن مشروع "تمكين مجتمع باطنابا" بتمويل من الوكالة الامريكية للتنمية الدولية ضمن برنامج "تحفيز" ، حيث تضمنت الجلسة الي أقامتها جمعية التحرير للتنمية مشاكل المراهقين مع الأهالي وكيفية معالجتها وكيفية توفير بيئة مناسبة من أجل بناء شخصية الانسان السليم بمشاركة طلاب وأهالي ومن كافة شرائح المجتمع.
تكول اونيلا "اني طالبة وهدفي أحقق احلامي واوصل للشي الي اريده، وأريد أن أكون إعلامية ناجحة، وهذه الجلسة الي صارت اليوم بقريتي كلش مهمة لأن الناس بحاجة لهيجي ورش وأنشطة وفعاليات علمود يكدرون يتأقلمون مع البيئة بعد تحريرها وأيضا علمود يكونون جزء من المجتمع ويشتغلون بتطوير قريتهم ويتمكنون همه بالقضايا المجتمعية علمود يساهمون بالتغيير الايجابي".
وتضيف أونيلا " باطنايا تعرضت لدمار مهول وشفنا حجم الدمار كان كلش كبير قياسا بالمناطق الاخرى، ولهذا شفنا عودة الحياة لهذه القرية كانت بصورة بطيئة واغلب الناس سافروا لخارج العراق، لكن الناس المتبقين بإصرارهم كدروا يرجعون الحياة، والي شاركوا بهذه الجلسة كدروا يستفادون من المواضيع الي انطرحت بيها وراح يكدرون يوصلون هذا الموضوع الي شاركوا بيه لأقرانهم ولمجتمع باطنايا".
رسالة أونيلا " أتمنى أن أشوف أنّه العراق يتعدل ويكون اكو فرص عمل والانسان ما يحتاج للواسطات وكلنا نساعد بعضنا البعض والعراق يبقى بأسم عالي ونكون مفتخرين ببلدنا، وأيضا أتمنى من المجتمع أنه يكدر يساهم بإيقاف العنف ضد المرأة لأن المجتمعات الي نعيش بيها هي مجتمعات ذكورية ما تنطي مجال للمرأة أن تشارك وتبدع وتخدم بلدها".
