مؤمن أزور عمري 23 سنة من مدينة الموصل، أعمل بمجال الإعلام والتمثيل واقدم برامج وأقدم ستاند اب كوميدي، كل هذه الشغلات ما تعلمتها اكاديميا حتى ماكانت هواية، حاولت أشتغل اكثر من شغلة ما تكون مرتبطة بشهادة معينة علمود أكون فد دافع للشباب انه مو الا يكون عندك شهادة تكدر تشتغل بهذا المجال، شاركت بورشة "الحد من التطرف العنيف"  ضمن مشروع (إشراك المجتمع المدني لبناء السلام المستدام في نينوى " الموصل، تلعفر وبعّاج") بدعم من قبل صندوق سلم من أجل الاستقرار، والممول من منظمة التعاون الألماني .

يكول مؤمن " الفن عبارة عن رسالة، عن طريق الكوميديا وعن طريق الفن ، هذه الرسالة نكدر نوصلها للناس بصورة عامة، وخاصة أنّه هذه الورشة مهمة فنكدر نخفف من التطرف عن طريق الفن من خلال لوحات ومن خلال المسرح والتمثيل ونشوف للناس أنه التطرف شي خطير والمتطرفين ما يشعرون انه هذا الشي غلط، شلون نفهمهم انه هذا الشي غلط ، من ننظر بنظرة ونعمل على بناء رسالة قوية نكدر نوصل كلشي من خلالها، وبسبب التطرف فقدنا ناس واثار وتراث وحضارة ، ومن خلال الفن نكدر نرجع جزء منها ونوضح للناس انه مو متطرفين".

ويضيف مؤمن " انا بيوم من الايام شفت تعليقات أنه المصلاوي داعشي أو ابن الانبار وابن صلاح الدين أيضا دواعش وهذه كانت انطلاقة الي اشوفها للناس مو كل الناس الي ساكنين بالموصل والانبار والمناطق الي كانت محتلة من داعش هم داعش! واحنا نحاول نشوفهم انه نحب الحياة وحالنا من حالكم وما نختلف عن ابن بغداد والبصرة وابن كردستان".

يختم مؤمن حديثه برسالة لكل الشباب " اشتغلوا لا توكفون عند حد معين وانتوا من تقدمون الفن حاولوا تستمرون ولازم نشوف للأشخاص الي عدهم تطرف أنه من خلال الفن نكدر نساهم بالقضاء على التطرف ، ولازم نشوف للمتطرفين أنه الحياة مو بس تطرف بيها ابتسامة وبيها فن وموسيقى وجمال، ولهذا شوفوا للناس الشغلات الايجابية ولا تركزون على القضايا السلبية".