22 May 2022

السلام يحتاج لبيئة مهيئة تساهم بالترويج اله!

اسمي علي احمد حمود من قرية السروج التابعة لقضاء البعاج وعمري 28 سنة، اليوم اجت جمعية التحرير للتنمية مع متطوعين ضمن مشروع "تعزيز التماسك الاجتماعي، السلام وقدرة المجتمع المدني على الصمود في غرب وجنوب غرب نينوى" بتنفيذ من جمعية التحرير للتنمية وبدعم من برنامج الأمم المتحدة الإنمائي،  ورسموا جداريات السلام والمحبة وجداريات تشجع الطلبة على التوجه إلى العلم وحب التعلم، وهذه المبادرات تقدم خدمات ايجابية للناس وتعزز مفاهيم الايجابية والطمأنينة عند الناس وتساهم بإزالة اثار ومخلفات داعش.

يكول علي " بصراحة قريتنا تعاني من هوايا مشاكل ومنها الخدمات الاساسية الي هي الشوارع والمدارس والمراكز الصحية والمياه الصالحة للشرب وفرص العمل ومشاريع استثمارية، وبصراحة من بعد تحرير محافظة نينوى ولحد اليوم دنعاني من هذه الأمور البسيطة الي تكدر تهتم بيها الحكومة والمنظمات".

ويضيف علي "طبعا نشكر المنظمة والمانحين والمتطوعين على هذه المبادرات الي هي رسم جداريات ومبادرات السلام والوقاية من التطرف لكن نحتاج مشاريع اقتصادية ومشاريع تخدم مناطقنا وتوفّر فرص عمل للناس، لأن ما معقولة ما عدنا مياه صالحة للشرب ونجي نشتغل على تعزيز الاستقرار لهذا لازم يكون خدمات وفرص عمل ومراكز صحية ومدارس وشوارع ومياه صالحة للشرب وبعدين تجي مرحلة السلام والمصالحة والوقاية من التطرف العنيف، يعني منطقتنا ما بيها مياه ولا مراكز صحية ولا خدمات ولا فرص عمل شلون نكدر نبني سلام ونعزز استقرار ونقنع الناس يبتعدون عن العنف والتطرف؟ ".
رسالة علي " أن يعم السلام بالعراق وان يكون اكو استقرار ويكون اكو اهتمام أكثر بالمناطق المهمشة والبعيدة والنائية لأن كل الدعم ديصير للمدن ومراكز الاقضية والنواحي وهذا الشي ديأثر سلباً على أهالي القرى ويخليهم أصلا متمسكين بهذه النظرة أنّه مهمشين".