اسمي سرحان حماد من قرية السروج التابعة لقضاء بعاج، عمري 24 سنة واني طالب جامعي بكلية الاداب قسم علم النفس، شاركت بالورشة الي أقامتها جمعية التحرير للتنمية ضمن مشروع "تعزيز التماسك الإجتماعي، السلام وقدرة المجتمع المدني على الصمود في غرب وجنوب غرب نينوى" الي يموّله برنامج الأمم المتحدة الإنمائي.
قرية السروج من القرى المهمشة والي تأثرت بالحرب الأخيرة مع داعش، وهي قرية تفتقر للعديد من الخدمات المجتمعية وأيضا تفتقر لعمل منظمات المجتمع المدني والحكومة المحلية بشكل واسع.
يكول سرحان " شاركت بهذي الورشة الي كانت حول التطرف والوقاية من التطرف وأيضا الي تضمنت العنف وبدائل العنف لأن بيها برنامج توعوي شامل والي تخص المجتمع، وشفنا بالورشة شي ملموس يخدم المجتمع وما يركز على فئة معينة وشفنا التحديات والمشاكل وشلون نكدر نشتغل وكل ورشة عمل ناخذ منها المشاركات الايجابية والي صعبة الحكومة تساهم بحلها بشكل مباشر".
ويضيف سرحان" كل الموضوع الي اخذناه متطابق مع افكارنا، والي حضروا ناس ممثلين من القرية وناقشنا موضوعات كلها بالصميم وشلون نكدر نعالجها، وهذه الورشة تهدف الى حوار ايجابي بناء، واذا عملنا كلنا نفس الطريقة الي تعلمناها بالورشة راح نكدر نحقق تغيير ونساهم بمواجهة التطرف".
ويختم سرحان حديثه "واحنا كفريق أو لجان مجتمعية بالتعاون مع الممنظمة راح نطلع بمبادرات تخدم المجتمع وتخدم الناس الي يعانون من التطرف والعنف والمشاكل والتحديات ونكدر نساهم سوية بحل هذه المشاكل".
رسالة سرحان الى الاهالي أن يتعاونون سوية علمود نصل إلى الحلول وننقل مشاكلهم إلى اللجان الخدمية عن طريق جمعية التحرير للتنمية، وضروري اليوم كلنا نتعاون من أجل أن نصنع التغيير الايجابي".
